Jeugprins Vinz I en Jeugprinses Myrthe I!

14 jan , 2020

Aafgeloupe zaoterdig zeen, tiejes ein gezellig drökke Jeugzitting, Vinz Stelten en Myrthe Reubzaat oetgeroupe tot Jeugprins en Jeugprinses! Same zulle zie ’t Jeugprinsepaar van 2020 vorme en veurop gaon tiejes de kommende Vastelaovend!!

Vinz is 11 jaor en eine zoon van Kevin Stelten en Susan De Bock. Hae zit in groep 8 van Basissjool De Lemborgh en haet auch nog ein braörke Mano. Nao sjool voetbalt Vinz gaer get mit vrunj en sjpeelt d’r gaer get sjpelkes op de pleej-steesjun of op de tillefoon. Vinz is dan auch lid van V.V. Zwentibold wo d’r 3x per waek te vènje is. Zien Prinselik palies bevindjt zich in de Michiels van Kessenichsjtraot en hae haet es adjudant gekaoze veur os lid Auwt Prins Frank I.

Auch Myrthe is 11 jaor en ein dochter van Claudia en Geert Reubzaat. Nao sjooltied geit Myrthe ’t leefste get sjoppe of get wanjele mit hondj Balou en daonaeve sjpeelt ze auch saxofoon bie meziekvereiniging Vriendenkring. Vastelaovend viere zit Myrthe, sjus wiej Vinz, in ’t blood en ze is dan auch ummer in ’t Doaleriek te vènje mit de drie gekke daag. Myrthe hilt eigelik van alle Vastelaovesmeziek mer Mae & (zus) Nynke, Kartoesj, Spik en Span, Hoondervel en Beppie Kraft höbbe toch waal haöre veurkeur. Myrthe woont in de Pastoor Janssesjtraot, same mit pap en mam en Ruben en Nynke. Os lid Auwt Prins Rudi I zal Myrthe gaon ongersjteune en funksjonere es adjudant.

Aaftraejend Jeugprins Bjarne en Jeugprinses Juul woorte op ein ludieke manaer opgenomme bènne de Auwt Jeugprins(esse).

De liefsjpreuk van ’t nuuje paar luidt es volg:

Laot alles rood-gael-gruin kleure,

dan laote veer es jeugPrinsepaar van ós heure.

Veer wille d’r same mit uch gans veur gaon,

Deze vastelaovend gaon v’r viere of d’r geine mörge zal besjtaon.

De resepsie van Vinz en Myrthe zal zeen op zaoterdig 1 fibberwari vanaaf 18.33 oer in gemeinsjapshoes “’t Waope” van Lömmerich.

Veer wunsje Jeugprins Vinz I en Jeugprinses Myrthe I ein geweldig en overgaetelik sezoen!

Proficiat!