2023: Prins Patrick I, Prinses Jill, Jeugprins Nick I, Jeugprinses Marke!

16 jan , 2023

Aafgeloupe zaoterdig is, tiejes de Prinsezitting van VV De Doale, Patrick Timmers oetgeroupe tot Prins Patrick d’n Eesjte. Patrick zal same mit zien Prinses Jill en’t nuuje Jeugprinsepaar Nick I en Marke de kommende Vastelaovend veurop gaon en gaon heerse euver ‘t Doaleriek. Laes wiejer veur meer informasie euver de nuuje Prinse en Prinsesse!

Patrick zoug 23 jaor geleeje ‘t laevesleich in ’t ziekehoes in Zitterd mer getaoge is d’r toch ech in ’t Lömmerichse. Es tamboer van Sjötterie Sint Salvius en es gitaris van BEES is hae eine bekènde muzikant in ’t Doaleriek. Daonaeve is Patrick eine fervent supporter van Fortuna Zitterd en haet d’r zellef auch jaorelangk gevoetbald bie VV Lömmerich en later VV Zwentibold.

In het dagelikse laeve is Patrick wirkzaam bie DOCO International en beheert d’r zien eige reisburo. Patrick zal begeleid waere door Auwt Jeugprins Marco Lebens, dae ’t kommende jaor es adjudant fungeert.

Patrick is de opvolger van Stan I, dae door ein ludieke ek woort opgenomme bènne de Auwt Prinsegarde Lömmerich. Veer heite Stan dan auch van harte welkom en wunsje haöm vaöl plezaer bènne de APL!

Prinses Jill is 25 jaor jongk en gebaore en getaoge in ’t Echter Aesterriek. Bie Zuyderland is Jill wirkzaam es psychogeriatisch toesbegeleidster en in haöre vrieje tied is zie gaer sjportief bezig. Daonaeve sjteit gezelligheid bie haör hoog in ’t vaandel waat de kommende Vastelaovend dus zeker geit lökke! Vriendin Naomi zal Jill assistere en ongersjteune in de kommende Vastelaovesperiode.

Prins Patrick en Prinses Jill, veer wunsje uch ein sjitterend sezoen en heel vaöl sjpas en plezaer!

Naeve ’t Prinsepaar waor ’t zaoterdig auch tied veur ’t bekèndmake van ’t nuuje Jeugprinsepaar. De sjpanning woort opgeveurd en oeteindelik woorte Nick Feron en Marke Hellenbrand oetgeroupe tot Jeugprins en Jeugprinses!

Nick is 12 jaor en eine zoon van Roy Feron en Wendy Banens. Hae zit in groep 8 van Basissjool De Lemborgh en haet auch nog eine braor Naut. Nao sjool voetbalt Nick gaer get mit vrunj en sjpeelt d’r gaer get sjpelkes op de pleej-steesjun. Nick is dan auch lid van V.V. Zwentibold en sjus wie Prins Patrick is Nick geregeld te vènje in ’t Fortuna-stadion. Zien Prinselik palies bevindjt zich in de Pesjtoor Janssesjtraot en hae haet es adjudant gekaoze veur Marcel ten Vaarwerk.

Marke is 11 jaor en ein dochter van Auwt Prins Stan I en Auwt Prinses Marielle. Nao sjooltied geit Marke ’t leefste get sjoppe of sjpelkes sjpele en daonaeve sjpeelt zie auch bugel bie meziekvereiniging Vriendenkring. Vastelaovend viere zit Marke, sjus wiej Nick, in ’t blood en ’t is dan auch eine druim dae oetkump om es Jeugprinses van De Doale veurop te gaon. Veur de res völt zie haöre vrieje tied mit knutsele en sjildere en dans zie bie JazzDance Limbricht. Marke woont, sjus wiej Nick, in de Pesjtoor Janssesjtraot, same mit pap en mam en braörke Loek. Auwt Jeugprinses Aniek zal Marke gaon ongersjteune en funksjonere es adjudante.

Aaftraejend Jeugprins Vik en Jeugprinses Laurie woorte opgenomme bènne de Auwt Jeugprins(esse).

De liefsjpreuk van ’t nuuje paar luidt es volg:

Kiek ós hie noe ens sjtaon,
vaere op de sjteek en ein kreunke op de kop,
Veer weite ’t zeker,
deze vastelaovend wurt helemaol top!

Profisiat Jeugprins Nick I en Jeugprinses Marke! Veer wunsje uch ein geweldig en onvergaetelik sezoen!

De resepsie van Prins Patrick, Prinses Jill, Jeugprins Nick en Jeugprinses Marke vindjt aansjtaonde zaoterdig (21 jannewari) plaats in gemeinsjapshoes “‘t Waope” van Lömmerich (18 oere 33).