Algemein, Doale

2024: Prins Rene II, Jeugprins Daan I, Jeugprinses Saar!

16 jan , 2024  

Aafgeloupe zaoterdig is, tiejes de Prinsezitting van VV De Doale, Rene Huvenaesj oetgeroupe tot Prins Rene d’n Tweede. Rene zal same mit zien Jeugprinsepaar Daan I en Saar de kommende Vastelaovend veurop gaon en gaon heerse euver ‘t Doaleriek. Laes wiejer veur meer informasie euver de nuuje Prins, Jeugprins en Jeugprinses!

Rene is eine zoon van os lid Jean I en Margriet Huvenaesj en al jaore ein van de kandidate veur ‘t Prinssjap. Dat bleek auch waal oet de oetsjlaag van de poll dae v’r veurige waek online höbbe geplaats. Rene is hie op ruume aafsjtandj baovenaan geëindig! Zowie d’r zellef zaet, haet d’r jaore op dit moment gewach en is d’r klaor veur alle sjoons waat komme geit.

Rene is trompettis van sjötterie Sint Salvius, wo hae de eesjte en de solopertie sjpeelt. Daonaeve haet d’r in ’t verleeje bie VV Lömmerich en VV Zwentibold es voetballer op ’t veldj gesjtange, wo de driede hèllef ’t grootste belang hej. Aangezeen Rene auch jedere maondj eine pubquiz bie Jiri organiseert en hae in ’t besjtuur van de Kesjteelbuurt zit, is Rene dus zeker geine onbekènde in ’t Lömmerichse. Daonaeve haet d’r in 2005 al mouge pruive aan ’t Prinssjap, door es Jeugprins ’t Vastelaovessezoen veurop te gaon. ’t Prinselik palies is te vènje op de Bornerwaeg wo hae same woont mit zien vrouw Nicole.
Nao de MAVO haet Rene de opleijinge Fysiotherapie en Evenementeorganizasie gevolg mer zien ruiping haet hae pas jaore later gevonje. Bie zörgcentrum Hoogstaete is hae wirkzaam in de auwerezörg.
Rene zal begeleid waere door Auwt Prins Salvian I, dae ’t kommende jaor es adjudant van Rene fungeert.

Rene is de opvolger van Patrick I, dae door ein ludieke ek woort opgenomme bènne de Auwt Prinsegarde Lömmerich. Veer heite Patrick dan auch van harte welkom en wunsje haöm vaöl plezaer bènne de APL!

Prins Rene II, veer wunsje dich ein sjitterend sezoen en heel vaöl sjpas en plezaer! Proficiat!

Eine daag eerder waor ’t vriedig auch tied veur ’t bekèndmake van ’t nuuje Jeugprinsepaar. De sjpanning woort opgeveurd en oeteindelik woorte Daan Verboord en Saar Cobben oetgeroupe tot Jeugprins en Jeugprinses!

Daan is 12 jaor en eine zoon van Joeri en Saskia Verboord. Nao sjool geit Daan op Basissjool Loedoes en hae haet auch nog twee braörs, Rens en Lars. Nao sjool voetbalt Daan gaer get mit vrunj en sjpeelt d’r gaer voetbalsjpelkes op de pleej-steesjun. Daan is dan auch lid van V.V. Zwentibold en is geregeld te vènje in ’t Fortuna-stadion. Zien Prinselik palies bevindjt zich in de Baeksjtraot en hae haet es adjudant gekaoze veur Auwt Prins Sven I.

Saar is 11 jaor en ein dochter van Auwt Prins Ralph I en Auwt Bloumekeuningin Yvonne Cobben. Nao sjooltied geit Saar ’t leefste get make-up sjoppe en danse bie Jazzdance Lömmerich of Urban Dance Factory. Daonaeve sjteit Saar same mit Sam en Lola in de finale van ’t KVL! Vastelaovend viere zit haör, sjus wiej Daan, in ’t blood en ’t is dan auch eine druim dae oetkump om es Jeugprinses van De Doale veurop te gaon. Saar woont, same mit pap en mam en braörkes Stijn en Jip op de Pesjtoor Janssesjtraot. Os lid Auwt Prins John I zal same mit Auwt Jeugprinses Nynke, Saar gaon ongersjteune en funksjonere es adjudant.

Aaftraejend Jeugprins Nick en Jeugprinses Marke woorte op ein grappige manaer opgenomme bènne de Auwt Jeugprins(esse).

De liefsjpreuk van ’t nuuje Jeugprinsepaar luidt es volg:

Sjnap uch vas en hos mer mit,

Op nao eine vastelaovend wao pit in zit!

Sjpring, dans en roop alaaf,

Nao de vastelaovend zeen veer vas weer braaf 

Profisiat Jeugprins Daan I en Jeugprinses Saar! Veer wunsje uch ein geweldig en onvergaetelik sezoen!

De resepsie van Prins Rene, Jeugprins Daan en Jeugprinses Saar vindjt aansjtaonde zaoterdig (20 jannewari) plaats in gemeinsjapshoes “‘t Waope” van Lömmerich (18 oere 33)

Door
Prins V.V. De Doale 2013. Auwt Prins sins 2014.



Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Ik accepteer de Privacy Policy

juni 2024
M D W D V Z Z
 12
3456789
10111213141516
17181920212223
24252627282930