Auwt Prinsegarde Lömmerich

Veul luuj zulle aafgeloupe zaoterdigaovend vraem op höbbe gekeeke doe d’r ein 35-tal Scouts door Lömmerich trochte. Krig of haet Lömmerich ein nuuj Scouting vereiniging ?

Niks van dat alles, allein de feesaovend van de Auwt Prinse sjting in ’t teike van de Scouting. De feesaovend (dit jaor georganiseerd door Wim I, Frank I, Eric I) vong plaatsj in en rondjom ’t Scouting geboew (De Jelhut) aan de Gronckelsjtraot.

Naodat jederein de eed haw aafgelach, woord eine korte toch door Lömmerich gemaak om op zuik te gaon nao …. ja nao wat eigelijk ? Nao truuk in de Jelhut te zeen gekomme (sommige groepe volgde de aanwiezinge get baeter es de angere), woorte de boekunste van ós APL’ers ongerzoch. Teeves woord eine rooje draod in wirking gesjteld (’t Moordsjpel, door sommige bekans letterlijk genomme), en koosjte ver al geneete van eine good verzörgde BBQ.

Nao ’t ‘Pingele’ (veur eine houp lestigere dan gedach, of ’t loug aan de drank!) bleef nog mer ein déngk euver…zörge dat ze neet ‘vermoord’ woors door angere APL’ers. Dit leverde aardig get interessante gevechte op die zelfs de dag d’r nao (op zunjig) nog woorte veurtgezat.

 

Al mit al eine zeer gesjlaagde Feesaovend, woovan sommige bezuikers nog ei paar waeke last van zulle höbbe!

Foto’s:

 

feesaovend, scouting

Door Awt Prins Pascal I '97

---

---