2017: Prins Sven I, Jeugprins Loeka I en Jeugprinses Dané I!

15 jan , 2017

Gisteraovend en aafgeloupe zunjig waor ’t waer zowiet… De oetruiping van de nuuje Prins, Jeugprins en Jeugprinses! Daonaeve woort aafsjied genomme van Prins Davy II, Jeugprins Finn I en Jeugprinses Demy I. Laes gauw wiejer veur eine truukblik!

Gisteraovend vonj alwaer de 6e edisie plaats van Herberg d’n Doal, de revue wo in de lètste jaore de nuuje Prins bekènd wurt gemaak. Mit mitwirking van eine houp Lömmerichse vereiniginge woort waer ein geweldig sjouwsjpel naer gezat, wo in de Auwt Prinsegarde Lömmerich uiteraard neit koosj ontbraeke. Naodat aaftraejend Prins Davy II op ein ludieke menaer woort opgenomme bènne de APL koosj waere toegewirk nao de klimaks van d’n aovend.. en de nuuje Prins is….: Sven d’n Eesjte (Mulder)! Veer wunsje Sven, same mit zien vriendin Chantal en adjudant Stan ein geweldig en onvergaetelik sezoen en vaöl sjpas in ziene regaeringstied!
Auwt Prins Davy II heite v’r vanzelfsjpraekend van harte welkom bènne de Auwt Prinsegarde Lömmerich. Proficiat!

Ein waek eerder waor ’t de beurt aan de Jeugprins en Jeugprinses. Jeugprins Finn I en Jeugprinses Demy I koosjte truuk kieke op ein fantastisch jaor, mer moosjte deze daag toch helaas aafsjied numme. Finn en Demy woorte nao eine heuse “AJL-kwis” opgenomme bènne de Auwt Jeugprinse(sse) en d’r woort plaats gemaak veur hun opvolgers. De sjpanning woort opgeboewd en oeteindelik woorte Loeka Diederen en Dané de Vrede nao veure geroupe es Jeugprins en Jeugprinses 2017! Auch Loeka I en Dané I wunsje veer heel vaöl sjpas en plezaer in ’t kommende Vastelaovesjaor! Proficiat!

Prins Sven I, Jeugprins Loeka I en Jeugprinses Dané I recipiejeere aansjtaonde zaoterdig in gemeinsjapshoes “’t Waope van Lömmerich” vanaaf 18.33.

Prins Sven I, Jeugprins Loeka I en Jeugprinses Dané I!

Veuraafgaond aan Herberg d’n Doal woort os lid (en teves Penningmeister) Erik II geinstalleerd es de nuuje Vors van VV De Doale. Erik is vanaaf noe de nuuje sjpraeksjtal van de Vastelaovesvereiniging en haet de eer om de 3 vaere op ziene sjteek te mouge drage. Erik Proficiat en heel vaöl suukses in diene tied es Vors!

Os lid en Ereveurzitter Pascal I woort daonaeve door de Vastelaovesvereniging benuimp tot Erelid, es bliek van dank veur zien jaorelange inzèt en werk veur VV De Doale. Pascal proficiat!