Oetsjlaeg ALAPS 2017

12 jun , 2017

Gister vonj de 3e edisie van ALAPS (Auwt Lömmerichse Auwt Prinse Sjpele) plaats. In ein heerlik zunke (mit toch ein paar dröppele tösjedoor) koosj d’r waere ingesjreve veur de welbekènde 3 ongerdeile: Langsaam fitse, Kratsjtapele en Eiersjmiette. Laes gauw wiejer veur eine truukblik en ein euverzich van de winnaars!

In de categorie Langsaam fitse wis Marco Leibes de eesjte plaats nao zich toe te trèkke. Marco wis ’t oetgezatte parcours het langsaams aaf te lègge door Sjuul Leibes (dochter van Auwt Prins Frank I) sjus veur te blieve in de finale. Marco moch dan auch de dikverdeinde wisseltrofee in ontvangs numme. Marco Proficiat!

In de categorie Kratsjtapele begoosjte 3 koppels aan de finalerunj. In de veurrunj wiste ein aantal koppels 18 kratte opein te sjtapele, dus de verwachting waor dan auch dat dit ’t minimaal aantal kratte zou motte zeen veur de euverwènning in de wach te sjleipe. Mike Vinclair en Bart Wolters wiste 17 kratte te sjtapele en Ger en Davy Sjrieje kaome tot de 18. De bèste jungskes van de klas waore echter Guido Sjrieje en Peter Sjaeks. Leifs 19 kratte ginge de loch in en zo kroonden zie zich tot wènnaars van ’t Kratsjtapele! Guido en Peter proficiat!

In de categorie Eiersjmiette mit deilnummers onger de 12 jaor bleke Sanne Creemesj en Math Creemesj de wietste aafsjtandj gegooid te höbbe. Mit 15,80 meter bleefte zie de konkurrensie veur en mouge zie zich ein jaor langk wènnaars van ’t Eiersjmiette onger de 12 jaor nuime. Sanne en Math Proficiat!

Tot sjlot de categorie Eiersjmiette >12. Mit eine aafsjtandj van ruum 35 maeter in de finale toonden wederom Peter Schaeks en Marco Lebens zich de sjterkste en mochte de wisselbaeker veur ’t 2e jaor op riej in ontvangs numme. Peter en Marco Proficiat!

Dank aan alle deilnummers, sjponsore en euverige luuj/instansies die ALAPS waer mede muigelik höbbe gemaak. Wellich tot volgend jaor!

Kaarte veur Domino zeen nog ummer te besjtèlle via ozze wesbsait!