Aafgeloupe zaoterdig is, tiejes de Prinsezitting van VV De Doale, Jan Creemesj oetgeroupe tot Prins Jan d’n Tweede. Jan zal same mit zien Prinses Rian, Jeugprinsepaar Loek I en Jeugprinses Luna de kommende Vastelaovend veurop gaon en gaon heerse euver ‘t Doaleriek. Laes wiejer veur meer informasie euver de nuuje Prins, Prinses, Jeugprins en Jeugprinses!
Jan (42 jaor jonk) is eine zoon van os lid Lei I en Christien Creemesj en al jaore ein van de kandidate veur ‘t Prinssjap. Dat bleek auch waal oet de oetsjlaag van de poll dae v’r veurige waek online höbbe geplaats wo hae eindigde in de baoveste regione.
Jan is trompettis van sjötterie Sint Salvius, wo hae greutsj de eesjte pertie sjpeelt. Daonaeve haet d’r in 1995 al mouge pruive aan ’t Prinssjap, door es Jeugprins ’t Vastelaovessezoen veurop te gaon. Dat Jan ’t Vastelaovesbloud van geine vraeme haet bliek waal es v’r in ozze Auwt Prinse-gallerie truuk kieke. Pap Lei en braor Math ginge haöm al veur es Prins in respektievelik 1980 en 2011. Math zal haöm daonaeve auch gaon assistere es adjudant.
De meiste luuj zulle Jan kènne van zien eige bedrief JC Delight, dat hae al jaore runt. ’t Leich en geluid op meinig feeske in Lömmerich mer auch grote en kleine projekte door ’t ganse landj, waere door Jan ummer tot in de puntjes verzörg.
Prinses Rian (Joosten) is 47 jaor jonk, gebaore in Remunj en al 20 jaor same mit Jan. Auch Rian haet de leifde veur de Vastelaovend al vruig lere kènne. Op de legere sjool waor Rian al Jeugprinses en auch haöre braor haet al es Prins veurop mouge gaon bie de Donderböl in Remunj.
Rian is wirkzaam es kapster en deit dit mit vaöl passie en plezaer. In haöre vrieje tied hilt zie erg van de natuur en geit d’r dan auch gaer op oet, same mit vriendinne en hondj Pixel, om de sjoonste plekskes in Limburg te verkènne.
’t Prinselik palies is te vènje op de Graasbrouksjtraot wo Jan en Rian same mit hun kènjer Sanne en Youri en hondj Pixel wone.
Prins Jan II en Prinses Rian, veer wunsje uch ein sjitterend sezoen en heel vaöl sjpas en plezaer! Proficiat!
Jan is de opvolger van Rene II, dae door ein ludieke ek woort opgenomme bènne de Auwt Prinsegarde Lömmerich. Veer heite Rene dan auch van harte welkom en wunsje haöm vaöl plezaer bènne de APL!
Eine daag eerder waor ’t op vriedig auch tied veur ’t bekèndmake van ’t nuuje Jeugprinsepaar. De sjpanning woort opgeveurd en oeteindelik woorte Loek Hellenbrand en Luna Rutjes oetgeroupe tot Jeugprins en Jeugprinses!
Loek is 11 jaor, eine zoon van Auwt Prins Stan I en Auwt Prinses Marielle Hellenbrand en ’t braörke van Auwt Jeugprinses Marke. Hae is lid van V.V. Zwentibold en is geregeld te vènje in ’t Fortuna-stadion wo hae de leidjes nao eige zègge keihel mit zungk. Zien muzikale kwaliteite kènt d’r kwiet bie de Muziekvereiniging en bie de Sjötterie, wo hae es sjlaagwirker op ’t vel huit. Zien Prinselik palies bevindjt zich in de Pastoor Janssesjtraot en hae haet es adjudant gekaoze veur Auwt Prins Guido I.
Luna is 10 jaor en ein dochter van Ruud en Kristie Rutjes. Nao sjooltied deit Luna ’t leifste get meziek loestere en danse bie Jazzdance Lömmerich. Auch is zie gek op daere, in ’t bezunjer op hondj Zora. Zösterke Mila en braörke Sepp zètte de tent gaer op de kop en zulle vas en zeker same mit Luna de Vastelaovend veurop gaon. Luna woont, same mit pap en mam en Mila en Sepp op de Vosdaalsjtraot. Os lid Auwt Prins Davy II zal same mit Michiel Meijers, Luna gaon ongersjteune en funksjonere es adjudant.
Aaftraejend Jeugprins Daan en Jeugprinses Saar woorte op ein grappige manaer opgenomme bènne de Auwt Jeugprins(esse).
De liefsjpreuk van ’t nuuje Jeugprinsepaar luidt es volg:
Veer gaon dit jaor veurop,
En zètte saame de kraom oppe kop!
Profisiat Jeugprins Loek I en Jeugprinses Luna! Veer wunsje uch ein geweldig en onvergaetelik sezoen!
De resepsie van Prins Jan, Prinses Rian, Jeugprins Loek en Jeugprinses Luna vindjt volgende waek zaoterdig (26 jannewari) plaats in gemeinsjapshoes “‘t Waope” van Lömmerich (18 oere 33)
hcb2zm